Տնտեսական զարգացման անորոշ հեռանկարներ
ԱՄՆ-ը դժվարությամբ է հաղթահարում ճգնաժամը

Ըստ Արժույթի միջազգային հիմնադրամի (ԱՄՀ)` ԱՄՆ տնտեսության վերականգնման հեռանկարները շարունակում են մնալ «անորոշ»: Պահանջարկը դեռ ցածր է, իսկ գործազրկության մակարդակը ոչ մի կերպ չի ցանկանում կրճատվել: ԱՄՀ-ն չի բացառում ԱՄՆ-ի հիպոթեկային շուկայի կրկնակի անկումը, քանի որ իրադրության վատթարացման ռիսկերը դեռևս չափազանց բարձր են:

Նշենք, որ ԱՄՀ-ն ներկայացրել է ԱՄՆ տնտեսության հետճգնաժամային աճի նոր գնահատականները: Ի դեպ` փորձագետների եզրակացությունները հուսադրող չեն: Ըստ նոր կանխատեսման` ԱՄՆ իրական տնտեսական աճը 2010թ. ակնկալվում է ՀՆԱ-ի 3,3%-ի, իսկ 2011թ.` ՀՆԱ-ի 2,9%-ի չափով: ԱՄՀ-ի կարծիքով` ամերիկյան տնտեսությունը պետական զանգվածային աջակցության շնորհիվ հաղթահարում է 20-րդ դարի Մեծ դեպրեսիայից հետո ամենասուր ֆինանսական ճգանաժամը:

Սակայն, ըստ պատմական չափումների, «տնտեսական աճը դանդաղ է ընթանում», իսկ «հեռանկարները շարունակում են մնալ անորոշ»: Իբրև անորոշության գործոն` ԱՄՀ փորձագետները նշում են «մասնավոր սեկտորի թույլ պահանջարկը» և «գործազրկության մակարդակի միայն չափավոր կրճատումը` դեպրեսիայից հետո գրանցված ռեկորդային բարձունքներից»:

«Վերջին շուկայական ցնցումները, պայմանավորված Եվրոպայի սուվերեն պարտքային ճգնաժամով, հանգեցրել են ֆինանսական պայմանների որոշ խստացմանը` չնայած կապիտալի`  դեպի «անվտանգ նավահանգիստ» ներհոսքին, ինչն էլ ԱՄՆ-ում պետական պարտատոմսերի եկամտաբերության անկում է առաջացրել: Հեռանկարում ռիսկերը բարձր են և ուղղված են իրադրության վատթարացմանը»,- ասված է ԱՄՀ փաստաթղթում: Նշենք, որ կանխատեսման համար «ռիսկ» ընդունված է անվանել նաև իրադարձությունների` սպասվածից ավելի բարենպաստ զարգացման հնարավորությունը:

Ինչպես նշեցինք, փորձագետները չեն բացառում նաև «հիպոթեկային շուկայի կրկնակի անկումը» և «արտաքին ֆինանսական պայմանների վատթարացման դեպքում» դրսից բացասական հետևանքների «ներհոսքը»: Ինչ վերաբերում է ապագայի խնդիրներին, ապա ԱՄՀ-ն խորհուրդ է տալիս պետական պարտքը կայուն ուղու վրա դուրս բերել:   
ԱՄՀ գործադիր տնօրենները «մակրոտնտեսական գլխավոր խնդիր» են համարում ԱՄՆ պետպարտքի կայունացումը: Նրանք նախազգուշացրել են, որ «ՀՆԱ-ի նկատմամբ պարտքի հարաբերակցության կայունացման համար ավելի խոշոր շտկում է հարկավոր, քան այն, ինչն ընկած է բյուջեի հիմքում»: Անհրաժեշտ են լրացուցիչ միջոցառումներ ինչպես եկամտային, այնպես էլ ծախսային մասով: Միաժամանակ, ըստ ԱՄՀ-ի, 2011թ. շտկումը պետք է ամրապնդվի միջնաժամկետ կայունացմանը հետևելու վճռականությամբ:

«Մակրոտնտեսական քաղաքականությունը մոտ հեռանկարում կշարունակի մնալ մեղմ»,- ասված է ԱՄՀ զեկույցում: Նկատի է առնվում, որ ԱՄՆ իշխանությունները մտադիր են 2011 ֆինանսական տարում շարունակել օգտագործել աճի խթանման միջոցառումները, թեև արդեն ուսումնասիրվում են պակասուրդների կրճատման հետագա քայլերը: 

Նախորդ ֆինանսական տարում, որն ավարտվել է 2009թ. սեպտեմբերի 30-ին, պակասուրդը կազմել է $1,41 տրլն (ՀՆԱ-ի 9,9%-ը): Ընթացիկ ֆինանսական տարում, ըստ կանխատեսման, այն ավելի բարձր կլինի` $1,47 տրլն, ինչն աննախադեպ մեծություն է` սկսած Երկրորդ համաշխարհային պատերազմի տարիներից:

Նշենք, որ ծախսված յուրաքանչյուր դոլարի 41 ցենտը բաժին է ընկնում ԱՄՆ-ին: Երկրի պետպարտքն արդեն հատել է ռեկորդային $13 տրլն-ի սահմանը:
www.cdaily.am