Վերջ Moody՚s-ի, Standard&Poor՚s-ի և Fitch-ի մենաշնորհին
Հայտնվել է նրանց եվրոպական մրցակիցը` ֆրանսիական Coface-ը

Շուտով կավարտվի ամերիկյան վարկանշային գործակալությունների մենաշնորհը: Ֆրանսիական Coface ապահովագրողը մտադիր է մինչև տարեվերջ սկսել աշխատանքը` որպես առաջին միջազգային վարկանշային գործակալությունը Եվրոպայում: Եվրոպական մրցակիցն աշխատելու է այլ կերպ, քան Moody՚s-ը, Standard&Poor՚s-ը և Fitch-ը. վարկանիշների համար կվճարեն ոչ միայն ընկերությունները, այլև օգտագործողները:

Coface-ն արդեն հայց է ներկայացրել Արժեթղթերի վերահսկողության եվրոպական մարմնին (CESR - The Committee of European Securities Regulators)` եվրոպական տասը երկրում (Գերմանիա, Ֆրանսիա, Մեծ Բրիտանիա, Իտալիա, Իսպանիա, Պորտուգալիա, Բելգիա, Նիդեռլանդներ, Չեխիա և Լեհաստան) իբրև վարկանշային գործակալություն աշխատելու թույլտվություն ստանալու համար:

«Այս քայլը նշանակում է, որ մենք հետևում ենք քաղաքական գործիչների այն պահանջներին, որոնք վերաբերում էին երեք խոշոր գործակալություններին այլընտրանք ստեղծելուն»,- ասել է Գերմանիայում Coface-ի ղեկավար Ֆրանց Միշելը: Քանի դեռ մեծ եռյակը հիմնականում ֆինանսական հաստատություններին է շնորհում վարկանիշներ, Coface-ը գնահատում է միայն ձեռնարկություններին:

Ինչպես Moody՚s-ը, Standard&Poor՚s-ը և Fitch-ը, այնպես էլ նրանց եվրոպական մրցակիցն օգտվում է տառային համակարգից` AAA-ից մինչև D: Նշենք, որ Coface-ը մտադիր է իր աշխատանքները` իբրև եվրոպական միջազգային վարկանշային գործակալություն, սկսել առաջիկա վեց ամսում:
www.cdaily.am