Հրատարակիչները` այժմ արդեն վիրտուալ աշխարհում

Ինտերնետ տեխնոլոգիաների զարգացումը դեռևս չի նշանակում ավանդական զանգվածային լրատվամիջոցների անխուսափելի վախճան. սա է ապացուցում մի շարք խոշորագույն հրատարակչատների փորձը: Նրանք վերակազմավորել են իրենց բիզնես մոդելները, և հիմնական շահույթն այժմ նրանք ստանում են ոչ թե տպագիր թերթերից և ամսագրերից, այլ ցանցային գովազդից և կոնտենտի համար ընթերցողների վճարումներից:

Ինչպես երևում է բրիտանական Pearson խմբի (տնօրինում է Financial Times պարբերականը և Economist ամսագիրը) և New York Times Company-ի (NYT, հրատարակում է համանուն թերթը) վերջին հաշվետվություններից, ինտերնետում այս հրատարակությունների եկամուտները վերջին երկու տարվա ընթացքում զգալիորեն աճել են: Եթե NYT-ի եկամուտների ընդհանուր աճն ընթացիկ տարվա II եռամսյակում նախորդ տարվա նույն ժամանակաշրջանի համեմատ աճել է 1,2%-ով (մինչև $586 մլն), ապա ինտերնետային գովազդից ստացված եկամուտներն աճել են միանգամից 20,5%-ով ($ 94,3 մլն): Այդպիսով` ցանցում թերթը վաստակում է հասույթի 16%-ը, և դա նրա գործառնական շահույթի հիմնական աղբյուրն է, ինչն էլ 2010թ. II եռամսյակում ավելացել է 40%-ով:

The Financial Times Group-ը` շնորհիվ իր թվային ծառայությունների (առաջին հերթին` կայքի վճարովի գրանցման), 2010թ. I կիսամյակում ստացել է իր հասույթի 36%-ը: Financial Times-ի և Economist-ի նյութերի մեծ մասը ցանցում վճարովի մատչում է պահանջում: Մինչդեռ ավանդական գովազդի օգնությամբ FT Group-ը II եռամսյակում վաստակել է հասույթի միայն 45%-ը:
Թերթերի և ամսագրերի տպագիր տարբերականներում գովազդը մշտապես հրատարակչատներին մեծ եկամուտներ է բերել: Այդ պատճառով ճգնաժամի ընթացքում, երբ գովազդատուները կրճատեցին տպագիր լրատվամիջոցների բյուջեները, այդպիսի կախվածությունը նրանց ֆինանսական դրության վրա վատ անդրադարձավ: Մի շարք խոշոր հրատարակություններ հարկադրված եղան վաճառել բաժնետոմսերը, որի վերջին վառ ապացույցը դարձավ ֆրանսիական Le Monde-ը: Բրիտանական PricewaterhouseCoopers-ի (PwC) կանխատեսմամբ` միայն 2013թ. կարելի է «թղթե» մամուլի եկամուտների 0,6% աճ ակնկալել: Փաստորեն, մինչև 2013թ. հրատարակիչների` ավանդական գովազդից ստացվող եկամուտներն անկում կապրեն:

Ինչպես գրում է «Կապիտալ» օրաթերթը, նախորդ տարի ինտերնետի շնորհիվ (գովազդը և գրանցումը) ամերիկյան հրատարակիչները $902 մլն են վաստակել (PwC-ի գնահատմամբ), ինչը կազմում է նրանց ընդհանուր եկամուտների միայն 6%-ը: Ըստ Morgan Stanley-ի վերլուծաբանների` ճգնաժամի ընթացքում տպագիր գովազդի ընդհանուր անկման պայմաններում այն հրատարակիչներն են կարողացել բարելավել իրենց ֆինանսական ցուցանիշները, որոնք մի քանի տարի շարունակ ինտերնետային հստակ ռազմավարություն են իրականացնում և ավելին՝ ցանցում զգալի եկամուտներ են ստանում ոչ միայն գովազդատուներից, այլև «հնազանդ» ընթերցողներից, որոնք պատրաստ են վճարել կոնտենտի մատչման և լրացուցիչ ծառայությունների դիմաց:

Tert.am