Հունիսի 15-ը` ՀՀ պետական դրոշի օր

Այս տարի "Մենք" ազգային արժեքների հիմնադրամը նախաձեռնեց Հայաստանի Հանրապետության պետական դրոշին նվիրված տոնակատարություն իրականացնել: Մենք ակնկալում ենք, որ հունիսի 15-ին նախանշված տոնակատարությունը կդառնա ամենամյա, քանզի կա հիմնավոր առիթ նոր տոն սահմանելու համար. նախª 2006թ-ի հունիսի 15-ին է ընդունվել ՀՀ պետական դրոշի մասին օրենքը, երկրորդª այսօրինակ համազգային, համապետական միջոցառումների անցկացումն այժմ անհրաժեշտություն է, քանզի բարձրացնում է համախմբվածության ոգին, նոր ուժ հաղորդում հայրենասիրական տրամադրություններին հասարակության շրջանում, թարմ հոսանք ապահովում ազգային գաղափարների տարածման համար: Առաջարկված ծրագիրն արժանացավ ՀՀ վարչապետ Տիգրան Սարգսյանի հավանությանն ու հեվանավորությանը: Ծրագրի շրջանակներում տպագրության է նախապատրաստվել և շուտով լույս կտեսնի ՙՄենք մեր մասին՚ ամսագիրը, որն ամբողջությամբ նվիրված է ՀՀ պետական դրոշին: Ամսագրում տեղ են գտել բազմաթիվ յուրօրինակ հրապարակումներ հայկական եռագույնի պատմության, ժամանակակից կիրառության, օրենսդրության վերաբերյալ:

Արդեն գործարկվել է www.yeraguyn.com կայքը, որն ամբողջությամբ նվիրված է հայկական եռագույնին:

Իսկ հունիսի 15-ը  հայոց պետական դրոշին նվիրված միջոցառումների առանցքային օրն է: Այդ օրը' երեկոյան ժամը 19.30-ին, Հանրապետության հրապարակից կմեկնարկի մեծ տոնական քայլերթ, որը կանցնի Նալբանդյան փողոցով, Սայաթ-Նովա պողոտայով, Ֆրանսիայի հրապարակով, Մաշտոցի  պողոտայով, ապա կրկին կվերադառնա Հանրապետության Հրապարակ: Տոնական քայլերթին մասնակցելու են հայտնի ու սիրված գործիչներ, համույթներ ու երգչախմբեր:

Կազմակերպիչները քաղաքացիների կողմից արդեն իսկ ստացել են տոնի նախաձեռնության վերաբերյալ ջերմ արձագանքներ, շնորհակալական խոսքեր, ինչը նշանակում է, որ մենք իրոք ունենք մեր ազգային արժեքների մեծարման ու վերստին գնահատման կարիքը: