"Լոնդոն-Երեւան"ապահովագրական ընկերության գործադիր տնօրեն Արամ Փիրուզյանի բացառիկ հարցազրույցը Banker.am պորտալին:

- Ինչպե՞ս կգնահատեք Հայաստանում ապահովագրական շուկան:

- Հայաստանում ապահովագրական շուկայի ծավալները` համեմատած ԱՊՀ այլ երկրների հետ, անհամեմատելի փոքր են: Դա ունի մի շարք պատճառներ: Պետք է նշել, որ մինչեւ վերջին տարիները Հայաստանում բավարար նշանակություն չի տրվել այս շուկայի զարգացմանը, սակայն այժմ կառավարության մոտեցումն ամբողջովին այլ է: Մյուս պատճառը, եթե հաշվի չառնենք Հայաստանում պարտադիր ապահովագրատեսակների բացակայության հանգամանքը, դա Հայաստանի աշխարհագրական և աշխարհաքաղաքական ներկա իրավիճակն է, որը խոչընդոտում է երկրի ինտեգրմանն աշխարհի հետ:

- Ի՞նչ միջոցներ են ձեռնարկվում շուկայի զարգացման համար:

- Մոտ երեք տարի է ինչ Կենտրոնական Բանկը զբաղվում է ապահովագրական շուկայի զարգացման հարցերով եւ հանդիսանում է այս ոլորտը վերահսկող մարմինը: Պետք է նշել, որ Կենտրոնական Բանկի կողմից բավականաչափ բարեփոխումներ են իրականացվել. ինչպես գիտենք, նախատեսվում էր նույնիսկ ավտոմեքենաների սեփականատերերի պատասխանատվության պարտադիր ապահովագրության ներդրումը եւ, որքանով մեզ հայտնի է, դրան խոչընդոտեց ներկայիս ֆինանսական ճգնաժամը: Սակայն կարծում եմ, որ հաջորդ տարվանից բարեփոխումները նոր թափով կվերսկսեն:

- Ըստ Ձեզ ապահովագրության ո՞ր տեսակն է մեր պետության համար ավելի հեռանկարային:

- Ընդհանրապես բոլոր երկրներում զարգացում են ապրում ապահովագրության պարտադիր տեսակները, որպես կանոն դրանք են` տրանսպորտային միջոցների սեփականատերերի երրորդ անձանց նկատմամբ պատասխանատվությունը, գործատուների պատասխանատվության եւ բժշկական ապահովագրություններըը: Ուստի հեռանկարի տեսանկյունից` ի լրումն պարտադիր ապահովագրության նշված տեսակների, որպես առավել հեռանկարային կարելի է դիտարկել բեռների ապահովագրությունը: Հաշվի առնելով այն, որ Հայաստանի տնտեսության վրա մեծ ազդեցություն ունեն ներմուծումն ու արտահանումը, հետեւաբար նշված տնտեսական գործառույթների հետ կապված ռիսկերի ապահովագրումը նույնպես կունենա հեռանկարային զարգացում:

- Ավելի շատ ապահովագրության ո՞ր տեսակի համար են դիմում Ձեր ընկերություն:

- Որպես կանոն մեզ դիմում են առևտրային գույքի, բնակելի տարածքների և տրանսպորտային միջոցների ապահովագրման համար: Որոշակի պահանջարկ կա նաև տնտեսավարող սուբյեկտների կողմից իրենց պատասխանատվության ապահովագրման գործում:

Վերջին ժամանակներում մեծ պահանջարկ է առաջացել բժշկական և առողջության ապահովագրության մասով: Տարբեր գործատուներ փորձում են իրենց աշխատակիցներին տրամադրել լրացուցիչ արտոնություններ, դրանով իսկ Հայաստան ներմուծելով արտերկրում լայն տարածում ունեցող ապահովագրական մշակույթը:

- Ներկայիս ֆինանսական ճգնաժամն ի՞նչ ազդեցություն է թողել ՙԼոնդոն-Երեւան՚ ապահովագրական ընկերության վրա: Արդյոք կրճատվե՞լ են հաճախորդների թիվը կամ Ձեր կողմից առաջարկվող ծառայությունների տեսակները:

- Ճգնաժամը սպասվածից քիչ բացասական ազդեցություն թողեց Լոնդոն-Երեւան ապահովագրական ընկերության վրա: Պետք է նշել, որ Հայաստանում ապահովագրության ոլորտը սերտորեն կապված է բանկային համակարգի կողմից վարկավորման ակտիվության հետ եւ բանկերի վարկային պորտֆելների կրճատումը պետք է որ հանգեցներ ապահովագրության ծավալների համապատասխան նվազմանը: Ի ուրախություն մեր ընկերությանը այդ հանգամանքը ընկերության գործունեության ծավալների վրա մեծ շեղումների պատճառ չդարձավ: ումարային  առումով անցյալ տարվա համեմատ ապահովագրավճարները նվազեցին 10%-ով:

- 2003թ. սկսած հավաքագրած ապահովագրավճարների ցուցանիշով ընկերությունը գտնվում է ՀՀ գործող ապահովագրական ընկերությունների առաջին եռյակում: Ինչպե՞ս է Ձեզ հաջողվում այս շուկայում առաջատար դիրքեր զբաղեցնել:

- Մեր ընկերության կարգախոսն է` երաշխիք, որակ, հուսալիություն: Մեր ամբողջ գործունեության ընթացքում մենք հավատարիմ ենք եղել այս կարգախոսին:

Ընկերությունը գրեթե արդեն տաս տարի գործում է Հայաստանի ապահովագրական շուկայում: Ընկերության հաճախորդներ են հանդիսանում արտադրության, ծառայությունների տարբեր ոլորտների ձեռնարկություններ, բանկեր, առևտրային կազմակերպություններ, սուպերմարկետների ցանցեր, որոնցից շատերն առաջատար դիրքեր են զբաղեցնում իրենց գործունեության համապատասխան բնագավառներում: Մեր բոլոր հաճախորդները համոզված են, որ իրենց ռիսկերը պատշաճ կերպով վերաապահովագրված են բարձր հուսալիություն և միջազգային ճանաչում ունեցող վերաապահովագրողների մոտ:  Ընկերությունը տիրապետում է բարձրակարգ և փորձառու մասնագիտական անձնակազմի, որը երբեք բարեխիղճ հաճախորդին չի թողնի մեն մենակ այն անակնկալների հետ, որ երբեմն նրանց կարող են մատուցել հանգամանքները:

- Արդյոք պատրաստվու՞մ եք ընդլայնել Ձեր ծառայությունները:

- Ապահովագրության տեսակների առումով փոփոխություններ չենք նախատեսում:  Ծրագրում ենք զարգացնել ընկերության ինտերնետային կայքը, որպեսզի հնարավոր լինի ապահովագրություն իրականացնել առցանց: Իհարկե դրա հետ կապված մի շարք օրենսդրական խնդիրներ կան, քանի որ ապահովագրական վկայագիրը պայմանագիր է և այն մեր օրենսդրության համաձայն պահանջում է երկկողմանի վավերացում: Բազմաթիվ երկրներում այդ հարցին համապատասխան լուծումներ են տրված և ինտերնետով ապահովագրության ձեռք բերումից և վճարումից հետո այդ փուլը շրջանցվում է:

- Ո՞րն է պատճառը, որ մարզերում մասնաճյուղեր չունեք: Ըստ Ձեզ դրա  անհրաժեշտությունը կա՞:

- Մասնաճյուղերի բացումը պահանջում է բավականաչափ ներդրումներ: Շուկայի փոքր ծավալների իրավիճակում, հաշվի առնելով նաեւ ներկա ֆինանսական ճգնաժամը, նպատակահարմար չենք գտնում նման ռիսկային որոշումներ կայացնել: Այնուամենայնիվ, մեզ թվում է, որ դրա անհրաժեշտությունը կա, քանի որ մարզերում գոյություն ունի որոշակի շուկա: Վերջին ժամանակներում այնտեղ սկսել են ակտիվ գործունեություն ծավալել բանկերը, ինչն ազդակ է այդ շրջաններում ապահովագրության զարգացման հեռանկարներին:

- Ձեր գործունեության հետ կապված որեւէ անեկդոտ կամ զվարճալի պատմություն կպատմե՞ք:

- Տարիներ առաջ, երբ ընկերությունը նոր էր գործունեություն ծավալել շատ հաճախ ընկերության գրասենյակ զանգեր էին հնչում և զանգողները հարցնում էին Լոնդոնի չվերթների օրերը, ժամերը ինչպես նաև տոմսերի արժեքները: Ընկերության երիտասարդ անձնակազմը շատ զվարճանում էր այդ դեպքերում: Ժամանակի ընթացքում, ընկերության ճանաչելիության բարձրացմանը զուգահեռ, նման զանգերը գրեթե բացակայում են: